O BNG reclama mobilizar as vivendas municipais baleiras para atender as familias en risco de desafiuzamento na Coruña
Por Axencia LQS
Avia Veira cualifica de moi grave a situación de Marta Zurahieva Sudomi e dos seus catro fillos menores e anuncia que o seu grupo continuará facendo un seguimento do caso ata que exista unha solución estable
A portavoz municipal do Bloque Nacionalista Galego no Concello de Coruña, Avia Veira, defendeu a necesidade de mobilizar as vivendas de titularidade municipal que permanecen baleiras para ofrecer unha resposta ás familias que se atopan en situación de emerxencia habitacional ou en risco de desafiuzamento.
Veira realizou estas declaracións durante unha entrevista centrada no caso de Marta Zurahieva Sudomi, unha muller refuxiada ucraina, nai de catro fillos menores, que atravesa unha situación habitacional especialmente delicada.
A portavoz do BNG explicou que o seu grupo coñece o caso a través da Plataforma de Defensa da Vivenda e doutros colectivos sociais que están acompañando a família. Segundo sinalou, desde que tiveron coñecemento da situación realizaron un seguimento da evolución.
Avia Veira cualificou o caso de moi grave e moi duro, ao tratarse dunha muller que tivo que fuxir dun pais en guerra, que está tratando sair adiante cos seus catro fillos menores e que se atopa nunha situación limite.
A portavoz nacionalista advertiu tamén do risco de que a familia poida quedar na rúa e da preocupación existente ante unha posible separación dos menores da súa nai.
Ampliación da bolsa municipal de alugueiro
Entre as propostas defendidas polo BNG, Avia Veira destacou a ampliación da bolsa municipal de alugueiro, dependente da empresa municipal de vivenda, asi como a reparación e posta a disposición das familias necesitadas das aproximadamente corenta vivendas de propiedade municipal que permanecen baleiras na cidade.
Segundo explicou, algunhas destas vivendas estan pendentes de pequenas reparacións e poderian representar non só unha solución puntual, senón tamén unha alternativa estable para familias como a de Marta Zurahieva Sudomi.
Veira sinalou que Marta pretende sair adiante, traballar e poder pagar o seu alugueiro, polo que considera imprescindible que as administracións públicas faciliten unha solución habitacional que lle permita recuperar unha vida estable xunto cos seus fillos.
Petición de explicacións ao Goberno municipal
A portavoz municipal do BNG confirmou que o seu grupo xa solicitou información e explicacións ao Goberno local sobre as actuacións realizadas desde que se tivo coñecemento do caso.
Na súa opinión, non se debería ter chegado a unha situación tan extrema. Considera que os servizos e as axudas públicas deberían terse activado antes de que se acumulasen os impagos do alugueiro e antes de que a familia quedase exposta ao risco dun desafiuzamento.
Avia Veira indicou igualmente que o BNG solicitou en diferentes ocasións reunións e actuacións por parte dos servizos municipais para abordar tanto este caso concreto como outras semellantes.
Máis vivenda pública e intervención dos servizos sociais
A representante nacionalista defendeu a mobilización de toda a vivenda de titularidade municipal dispoñible e a construción de nova vivenda pública na Coruña.
Con todo, lembrou que as principais competencias en materia de vivenda corresponden á Xunta de Galicia. Por este motivo, afirmou que o BNG tamén reclama diariamente no Parlamento galego que o Goberno autonómico impulse a creación de vivenda pública suficiente.
Para o BNG, a intervención dos servizos sociais debe producirse antes de que as familias entren nunha situación de impago que poida acabar nun desafiuzamento.
Veira advertiu de que poden aparecer máis casos semellantes e insistiu en que resulta urxente poñer as vivendas municipais baleiras a disposición das persoas que realmente as necesitan.
Seguimento do caso ata lograr unha solución estable
Avia Veira confirmou que o grupo municipal do BNG está disposto a continuar realizando un seguimento da situación da Marta Zurahieva Sudomi e dos seus catro fillos menores ata que exista unha solución habitacional estable.
A portavoz explicou que o seu grupo mantén contacto coa plataforma que acompaña a familia para coñecer a evolución do caso e as posibles actuacións das administracións implicadas.
Durante a entrevista tamén se lle propuxo ao BNG formular unha serie de preguntas ao Goberno municipal para coñecer que actuacións concretas realizou desde que tivo coñecemento do caso, que solución habitacional estable propón para a familia, que recursos económicos e sociais se mobilizaron e se existe un calendario de actuacións.
Avia Veira manifestou que estas preguntas poden presentarse por escrito ou trasladarse ao Pleno municipal mediante diferentes fórmulas, co obxectivo de obter respostas oficiais e deixar constancia das actuacións realizadas.
A entrevista concluíu co compromiso de continuar seguindo o caso e de reclamar ás administracións unha resposta que garanta o dereito de Marta Zurahieva Sudomi e dos seus catro fillos menores a dispoñer dunha vivenda digna e estable.
Petición de entrevista pendente
Así mesmo, cómpre lembrar que o pasado 21 de xullo de 2026, ás 11:35:22 horas, foi presentada, a través do Rexistro Municipal do Concello da Coruña, unha solicitude de entrevista persoal dirixida ao concelleiro de Urbanismo, Rehabilitación e Vivenda, don Francisco Dinis Díaz Gallego, co propósito de coñecer a súa valoración e as posibles actuacións municipais ante a situación habitacional de Marta Zurahieva Sudomy e dos seus catro fillos.
A día 29 de xullo de 2026, aínda non se recibiu confirmación sobre a concesión ou denegación da devandita entrevista.
Queda, polo tanto, pendente a resposta do responsable municipal, cuxa versión resultaría de especial interese para ofrecer unha información completa e recoller a posición de todas as partes implicadas.
Comparte este artigo, os teus amigos o agradecerán…
Mastodon: @LQSomos@; Friendica: Loquesomos;
UpScrolled: @LQSomos; Telegram: LoQueSomosWeb;
Bluesky: LQSomos; Facebook: LoQueSomos;
Instagram: LoQueSomos; WhatsApp: LoQueSomos;
Youtube: @LoquesomosAudiovisual
